लघुकथा-भिन्नता

"सर आज मेरो पेट निक्कै दुख्दैछ,काम गर्न सक्छु जस्तो लाग्दैन।त्यसैले अनुरोध गर्न आएकि आजलाई बिदा दिनु पर्यो।"- देव्यानीले मधुर स्वरमा अनुरोध गरिन

"के भएर दुख्यो हो त तिम्रो पेट?"-केहि ठाट्टा गर्दै सोमनाथले प्रश्न गरे

"सर पनि महिलालाई किन पेट दुख्छ हजुरलाई थाहा छैन?"-देव्यानी मुसुक्क मुस्काउदै बोलिन्

"ठीक छ,भोलि पनि ठिक नभए मलाइ एक कल गर्नु अनि आराम गर्नु,केहि दवाई पनि लिनु है।पैसा त छ तिमी सँग?" सोमनाथले सुझाब मुलक बिदा दियो

देव्यानी बाहिर निस्कन लागेकि थिइन सोमनाथको फोन बज्यो।

फोनबाटनै खाउला जस्तै गरेर सोमनाथले गाली गर्यो,तिम्रो यो नाटक म बिवाह गरे देखि देख्दैछु,महिना महिनामा यसरी बिरामीको नाटक आखिर कहिले सम्म?तिमिहरुको यो सबै बहाना म राम्रो सँग बुझ्छु।सोमनाथले अफिसनै थर्किने गरि फोनमा कुरा गर्यो।

उता बाट फोनमा के भनियो होला देव्यानीले अनुमान सम्म गरिन्।